香草滋味

在網站看到倪震出新書，附上的摘要看完笑到半死，跟大家分享一下。


以下內容均擇自 http://www.yesasia.com：

"絕世好詩"

　　在國內網站看到篇文章，咬文嚼字，大拋書包，甚妙；改成廣東話對白，更趣。《東地》 讀者，不妨考考自己，文中詩詞，知道多少出處，懂得一半，也不簡單了。 

女：「o下，你溝我？你唔係有女朋友o既咩? 」
男：「十年生死兩茫茫，不思量，自難忘。」
女：「佢死o左?點死o架? 」
男：「山無陵，江水為竭，冬雷陣陣夏雨雪。」
女：「天災？咁邪？咁你咪好傷心？」
男：「滿面塵灰煙火色，兩鬢蒼蒼十指黑。」
女：「唉，一枝公，咁陰公。咦，咁你點解又有心機溝我呀？」
男：「忽如一夜春風來，千樹萬樹梨花開。」
女：「口花花，我有咁索咩？」
男：「糟粕所傳非粹美，丹青難寫是精神。」
女：「咁識講o野，喂，你有冇錢o架？」
男：「他年若遂淩雲志，敢笑黃巢不丈夫。」
女：「哦，冇錢，不過有上進心o個隻。你鍾意我咩呀?」
男：「只在此山中，雲深不知處。」
女：「兜圈，你讀好多書個咩，講o野咁鬼深?」
男：「軍書十二卷，卷卷有爺名!」
女：「吹到咁勁，做咩撈咁耐都仲係單身寡佬，人又冇，錢又冇呀？」
男：「小姑未嫁身如寄，蓮子心多苦自知。」
女：「咁如果我受溝，你會唔會娶我o架？」
男：「洛陽親友如相問，一片冰心在玉壺!」
女：「結o左婚唔會鬼馬先？」
男：「波瀾誓不起，妾心井中水。」
女：「咁筍？信住你先啦。不過，我要去美國讀書，你等唔等我o架?」
男：「寧飲建業水，不食武昌魚，寧還建業死，不止武昌居。」
女：「講就一條心，咁你唔會掛住我o既咩？ 」
男：「獨自憑欄，無限江山，別時容易見時難!」
女：「但係……」
男：「望夫處，江悠悠，化為石，不回頭!」
女：「好啦好啦，怕o左你，唔好吟啦，我唔要條仔咁煩o架！」 


五年後 

女：「結o左婚咁耐，你仲掛住你條舊菜？」
男：「曾經滄海難為水，除卻巫山不是雲。」
女：「咁你當初又溝我？又同我結婚？」
男：「夢裏不知身是客，一晌貪歡。」
女：「有冇搞錯呀，註晒冊o架，玩呀？」
男：「夫妻本是同林鳥，大難臨頭各自飛。」
女：「你真係咁絕？一夜夫妻百夜恩，你咪蝦我唔識吟詩喎！」
男：「醒來幾向楚巾看，夢覺尚心寒!」
女：「你有咁慘？你當日咪話一見到我就……」
男：「美女如花滿春殿，身邊惟有鷓鴣飛。」
女：「你咁講o野？你就鷓鴣……」
男：「昔日齷齪不足誇，今朝放蕩思無涯。」
女：「唉，一直以來朋友寫信話你衰我都唔信，原來你真係人面獸心。」
男：「紙上得來終覺淺，絕知此事要躬行。」
女：「你o的理想呢?死晒o拿？」
男：「且把浮名，換了低斟試唱。」
女：「嗚……嗚……，你唔係話一片冰心o既咩?」
男：「不忍見此物，焚之已成灰。」
女：「你唔怕我唱衰你？」
男：「寧可抱香枝頭死，何曾吹落北風中。」
女：「我唔肯分手呢？」
男：「分手尚且為兄弟，何必非做骨肉親。」
女：「你真係一o的唔捨得都冇？」 ......